اللمسات الادبية

**عبدالباقي الضو الكاهلي** · الأحد 26 مارس 2017, 00:56

لما الحروف تمرق تفتش قبلة لي انسان وفي
لما العيون تصدق تبين قوة احساسنا الخفي
حتى الاسف بهدي الكلام للبسمة والهم يختفي
******
ما غاب نجمنا إلا يوم غابت اغاني العاشقين
وما مات فرحنا إلا جفنا الوفاء الساقي الحنين
نحنا البقينا بلا عمر ورمينا همنا في السنين
اصبح عشمنا حزم غني رمينا في الشاطئ الامين
******
لما الحروف تنبض وجع وتنزف علي الصفحات اسف
ولما العيون تبدأ الطمع وما ترمي إلا على الهدف
حتى الشمس يمكن تضن وتمنع ضياها عن الهدف
******
الدنيا ايه غير أمنيات منساية في مجري العبير
وغير زفة من الاغنيات ممزوجة بي فرح الصغير
ما دام صحيح انو المصايب حددت سير المصير
كيف يحزن انسان بشوف يضحك انسان الضرير
*******
لما الحروف تتحد حزن الليل تشيلو من الصباح
ولما العيون تتمنى خير النيل يعم كل البطاح
ما بنلقي في جوف الزمن إلا الغنا الصافي المباح
******
شوفو الكنار ما لاقي عيش لكنو غرد وانتشى
لمن لمح خيط الندي في صفحة الازهار مشي
ليه ما نكون زي الطيور الفيها حب الغير نشا
وليه ما نكون زي النسيم نهدي الزمان الطيبة
*******
لما الحروف تصبح رياح وتوزع الشوق في الضفاف
ولما العيون تمطر سماح في عزة الأرض الجفاف
حتى الزمن يزهر وفا وتلبس غنواتنا الزفاف
******
مليون عشم في الانتظار يتقلي في حر الهيب
ومليون قمر ضوي الطريق يهدينا لو الشوق ضهب
كل العيون تهتف تقول لازم نفرح ولازم نحب
ما الطيبة يا الناس الحنان راجيانا في اخر الطريق
لما الحروف تصبح عيون وناسه في جلسة حنان